La libreto "La eta leono lernas aliajn blekojn", kiun mi aĉetis dum la IJK en Lignano Sabbiadoro, tuj fariĝis preferata legaĵo de mia filo. La rakonto estas konciza, amuza kaj eduka. La paĝoj estas bele ilustritaj per la bildoj de la brazila artistino Anna Lobo de Carvalho. La strukturo de la libro estas bone pritraktita, kun teksto sur ĉiu maldekstra paĝo kaj bildoj sur la dekstra paĝo. Estas ankaŭ menciinde, ke la tipara grando estas taŭga. Tia aranĝo certigas, ke la legantoj ĝuos facile la legadon kaj la rigardadon de la libro. La rakonto pri eta leono, loĝanta en Afriko, kiu decidas lerni la blekojn de siaj amikoj, estas ĉarma. Dum lia aventuro li malkovras la utilecon de ĉi tiuj scioj. Tiu ĉi temo pri besta (aŭ homa) interkomprenemo ege plaĉis al mi. Lode Van de Velde estas aŭtoro ne nur de porinfanaj libroj, sed ankaŭ de prozaj, poeziaj kaj fakaj verkoj. Tio montras liajn ampleksajn interesojn kaj talenton. Post la ĉefa rakonto estas kelkaj instruaj paĝoj pri diversaj bestoblekoj kaj proverbojn, kio kontribuas al pli profunda kompreno kaj ofertas riĉan kroman materialon por lerni. En la libro estis nur unu stumblaĵo (laŭ mi): "[...] venis galopantaj ĉevaloj, kurantaj leonoj kaj lupoj." Miakomprene, ĉar la eta leono lernis la blekojn de ĉevaloj, lupoj kaj elefantoj, estas verŝajne, ke la ĝusta teksto devis esti "[...] venis galopantaj ĉevaloj, kurantaj elefantoj kaj lupoj." La libro estas taŭga por infanoj ekde 3 jaroj. Eldonita de Eldonejo Libera en 2021, ĝi enhavas 32 paĝojn. La aŭtoro, Lode Van de Velde, kune kun la ilustristino Anna Lobo de Carvalho, kreis plezuran libron, kiu ne nur amuzas, sed ankaŭ edukas, farante ĝin bonega aldono al iu ajn hejmo aŭ lernejo.